पोखरा एभेन्जर्सका क्यानडेली ब्याटर युभराज साम्राले नेपाल प्रिमियर लिग (एनपिएल) मा आफ्नो पहिलो शतक आमाबुबालाई समर्पित गरेका छन्।
कर्णाली याक्सविरुद्ध शतकीय इनिङ खेलेपछि उनले आफ्नो क्रिकेट यात्रामा आमाबुबाले गरेको मेहनत र दिएको साथप्रति आभार व्यक्त गरे।
‘यो शतक मेरी आमा र बुवाका लागि हो। उहाँहरूले मेरो लागि धेरै मेहनत गर्नुभएको छ। आज म जहाँ छु, त्यसको श्रेय उहाँहरूलाई नै जान्छ,’ उनले खेलपछि भने।
नेपालमा खेल्न पाउँदा आफू निकै खुसी रहेको बताउँदै साम्राले नेपाली दर्शकको प्रशंसा गरे। नेपाली समर्थकको अगाडि खेल्नु विशेष अनुभव भएको उनको भनाइ थियो।
कर्णालीविरुद्धको खेलमा शतक प्रहार गर्दा उनले आफ्नो ब्याटिङ योजना सरल राखेको बताए। ‘म आफ्नो योजनामा टिकिरहन्छु। सिधा खेल्ने र साइटस्क्रिनलाई लक्ष्य बनाउने मेरो योजना हुन्छ,’ उनले भने।
पावरप्लेमा आक्रामक ब्याटिङ गर्दै विपक्षी बलरलाई सुरुमै दबाबमा राख्नु आफ्नो रणनीति रहेको उनले खुलाए। क्रिजमा हुँदा धेरै सोच्नेभन्दा बलको अवस्था हेरेर निर्णय गर्ने उनको भनाइ छ।
‘म धेरै सोच्दिनँ। बल मेरो क्षेत्रमा आयो भने प्रहार गर्छु, नभए स्ट्राइक रोटेट गर्छु,’ उनले आफ्नो ब्याटिङ सोचबारे भने।
अनुभवी खेलाडीसँग खेल्दा आफूले धेरै कुरा सिक्ने अवसर पाएको साम्राले बताए। युरोपियन टी–२० प्रिमियर लिगमा स्टिभ स्मिथ र टिम डेभिडजस्ता खेलाडीसँग एउटै टोलीमा रहँदा उनीहरूको खेल्ने शैलीबाट सिकेको उनले सुनाए। उनीहरूबाट खेललाई सहज र सरल रूपमा लिनुपर्ने कुरा सिकेको साम्राको भनाइ थियो।
पोखराको प्लेअफ सम्भावनाबारे सोधिएको प्रश्नमा उनले टोलीले अहिलेको प्रदर्शनलाई निरन्तरता दिन सके लक्ष्य हासिल गर्न सक्ने विश्वास व्यक्त गरे।
कर्णालीविरुद्ध साम्राले ४८ बलमा १० चौका र ६ छक्कासहित १०२ रन बनाएका थिए।
उनको शतकीय इनिङ र कुशल भुर्तेलसँगको १३६ रनको साझेदारीमा पोखराले निर्धारित २० ओभरमा ३ विकेट गुमाएर २१७ रन बनाएको थियो।
जवाफमा कर्णाली १५४ रनमा समेटिएपछि पोखराले ६३ रनको जित निकाल्दै प्रतियोगितामा पहिलो जित दर्ता गरेको थियो।
